GAUTENG – Vyf persone wat daarvan verdink word dat hulle glo rekrutering vir die Russiese weermag wou doen, se saak is Dinsdag in die Kempton Park-landdroshof tot 29 April uitgestel. Elke beskuldigde word aangekla van die oortreding van die Wet op die Regulering van Buitelandse Militêre Hulp, Wet 15 van 1998.
Magaboke Mohlatlole, woordvoerder vir die nasionale vervolgingsgesag, sê die uitsteltydperk word gebruik om finansiële intelligensieverslae vir al die beskuldigdes te bekom en om moontlike regshulp van Rusland aan te vra. Die vyf beskuldigdes, Patricia Mantula (39), Thulani Mazibuko (24), Siphamandla Chabalala (23), Sfiso Mabena (21) en nog een persoon is in hegtenis geneem nadat die OR Tambo-polisie hulle ondersoek het toe hulle probeer het om deur die Verenigde Arabiese Emirate na Rusland te vlieg.
Daar word vermoed dat Mantula die ander beskuldigdes se reise en indiensneming deur die Russiese weermag gefasiliteer het. Verdere ondersoeke het gelei tot die inhegtenisneming van die res van die groep.
