INDIë. – Indië het nuwe reëls ingestel wat dit verpligtend maak vir sosialemediamaatskappye om onwettige inhoud binne drie uur te verwyder nadat hulle daarvan in kennis gestel is – ’n beduidende verskerping van die bestaande sperdatum van 36 uur.
Volgens die BBC tree die gewysigde riglyne op 20 Februarie in werking en sal van toepassing wees op groot platforms, insluitend Meta, YouTube en X. Dit sal ook geld vir inhoud wat deur kunsmatige intelligensie (KI) gegenereer is.
“Dit is prakties onmoontlik vir sosialemediaplatforms om inhoud in drie uur te verwyder,” het Akash Karmakar, ‘n vennoot in die Indiese regsfirma Panag & Babu, wat in tegnologiewetgewing spesialiseer, gesê.
Die regering het nie ’n rede verskaf vir die verkorting van die tydperk waarbinne inhoud verwyder moet word nie.
Kritici is egter bekommerd dat die stap deel vorm van ’n breër verskerping van toesig oor aanlyn inhoud en kan lei tot sensuur in die wêreld se grootste demokrasie met meer as ’n miljard internetgebruikers.
Bronne: BBC, Saudi Gazette
