BARCELONA. – President Cyril Ramaphosa is op ‘n ampsbesoek aan Spanje, waar hy deelneem aan die inisiatief genaamd Ter verdediging van Demokrasie (TVD) in Barcelona. Die doel van die inisiatief is om te besin oor die toenemende wêreldwye uitdagings wat demokratiese nasies in die gesig staar.
Die president het die dringende behoefte aan kollektiewe optrede en hernieude internasionale samewerking beklemtoon.
“Ons kom hier in Barcelona byeen in ’n tyd wanneer die wêreld in ’n krisis verkeer. Dit is ’n tyd van aggressie, oorlog, konflik en vernietiging. Die beginsels van solidariteit, samewerking en vriendskap word uitgedaag deur die herlewing van eng nasionalisme, vooroordeel en onverdraagsaamheid,” het Ramaphosa gesê.
Hy sê voorts dat, alhoewel dit ’n tyd van krisis is, nasies nie moet twyfel of in wanhoop verval nie, maar eerder moet optree en help om ’n meer inklusiewe wêreld te vorm. Hy voeg by dat ’n “globale progressiewe herlewing” aan die gang is. Ten slotte het hy mense aangemoedig om deel te wees van die bou van ’n beter en meer regverdige wêreld.
Bron: SABC Nuus
