Die departement van korrektiewe dienste het kapsie gemaak teen bewerings dat paroolgangers nie behoorlik gemonitor word nie en sê sulke aantygings is misleidend en sonder konteks.
Die departement ontken dat dit opgehou het om ontduikers op te spoor en beklemtoon dat sy gemeenskapskorreksiestelsel, wat uit 1 764 beamptes bestaan, aktief paroolgangers en diegene op probasie landwyd monitor. Elke ontduiker word onmiddellik by die polisie aangemeld en spanne in alle streke bly aktief betrokke by opsporing en herinhegtenisneming.
Die departement erken wel uitdagings soos begrotings, personeeltekorte en toenemende gevalleladings, maar sê dit word deur operasionele hersienings en samewerking met veiligheidsvennote aangespreek. Oor die afgelope twee jaar het 5 760 paroolgangerss weer misdade gepleeg, ‘n vervalkoers van 10,98%.
Suid-Afrika se gevangenisse huisves tans 168 795 gevangenes teen ‘n goedgekeurde kapasiteit van 107 067, wat neerkom op ‘n oorbevolkingsyfer van 58%. Daarbenewens is 52 772 paroolgangers en diegene op probasie onder gemeenskapstoesig.
