‘n Vier maande oue renosterkalf, Elia, ontvang intensiewe veeartsenykundige sorg, nadat hy gewond is toe stropers sy ma doodgeskiet en haar horings afgekap het.
Volgens Baby Rhino Rescue is Elia se ma, Ella, ‘n bekende renosterkoei, deur stropers doodgeskiet. Nadat haar horings verwyder is, het die stropers ook op die hulpelose kalf losgebrand. Die organisasie sê die koeël het deur Elia se borskas gegaan en sy longe beskadig. Ondanks sy ernstige beserings het die koeël geen lewensbelangrike organe of bene getref nie.
Elia word tans deur ‘n toegewyde veeartsenykundige span behandel. Hoewel hy pyn ervaar, drink hy goed en toon hy geleidelik tekens van herstel. Daar is hoop dat sy longe met tyd en behoorlike behandeling sal genees. Baby Rhino Rescue sê Elia se verhaal is nie ‘n alleenstaande geval nie en dat verskeie renosterkalwers tans wees is nadat hul moeders deur stropers doodgemaak is.
Die organisasie ondersteun die betrokke renosteropvangsentrum deur melk, voer en veiligheidsmaatreëls te help befonds in samewerking met Rhino Connect NPO. Hulle doen ‘n beroep op die publiek om renosterbewaring te ondersteun en bewusmaking oor renosterstropery te bevorder.
