GAUTENG. – Die polisie het tydens verskeie operasies in Johannesburg, Ekurhuleni en Sedibeng beslag gelê op 1 721 vervalste, smokkel- en onwettige produkte met ’n totale geraamde waarde van R889 980.
Volgens die SAPD is die operasies tussen 15 en 18 September deur lede van die Gautengse eenheid en die nasionale eenheid teen vervalste goedere, met ondersteuning van handelsmerkbeskermers, uitgevoer.
Op 15 September is op 222 vervalste tekstielprodukte met ’n geraamde waarde van R100 000 tydens ’n operasie by Dragon City in Johannesburg se middestad beslag gelê.
Op 17 September is verdere operasies in Springs en Orange Farm uitgevoer. Altesaam 991 items ter waarde van R760 300 is gekonfiskeer.
Onder die items was 598 kg Taxi- en Ntsu-snuif, ter waarde van R598 000, asook 1 800 leë houers, ’n rol krimpfoelie vir etikettering, ’n hittepistool en ’n seëlaar.
Die polisie het ook op handelsmerk-sleutelhouers, parfuum, seëlmiddel vir enjinpakplate, sagte speelgoed, bordspeletjies, kaartspeletjies en 393 items van onwettige gif beslag gelê.
Op 18 September het lede van die Gauteng-polisie se eenheid vir vervalsing en onwettige goedere, met ondersteuning van ’n handelsmerkbeskermer, nege winkels in Cosmo City besoek. Altesaam 508 items met ’n geraamde waarde van R29 680 is op beslag gelê.
Dit het 193 vervalste verbruikersprodukte, ses vervalste selfoonbykomstighede, 169 onwettige heuningprodukte en 140 onwettige farmaseutiese produkte ingesluit.
Volgens die SAPD het die drie operasies gelei tot die beslaglegging op 1 721 items en verwante onwettige produkte met ’n gesamentlike geraamde waarde van R889 980.
Die polisie sê hulle sal voortgaan om saam met handelsmerkbeskermers en ander regulerende owerhede op te tree teen ondernemings wat by die verspreiding en verkoop van vervalste, smokkel- en ander onwettige goedere betrokke is.
Lede van die publiek kan vermeende onwettige aktiwiteite by Crime Stop op 08600 10111 aanmeld of hul naaste polisiestasie besoek.
Bron: SAPD
