GAUTENG. – Die adjunkhoof (53) van Laerskool Bronkhorstspruit, wat teregstaan op drie verkragtingsaanklagte teen ‘n 8-jarige leerling, is deur die plaaslike landdroshof op borg van R5 000 vrygelaat.
Lumka Mahanjana, NVA-woordvoerder, sê in ’n verklaring die borgtog sluit streng voorwaardes in; die beskuldigde moet twee keer per week by die Bronkhorstspruit-polisiekantoor aanmeld. Geen kontak kan met die klaer of haar familie gemaak word nie, enige adresverandering moet aan die ondersoekbeampte gerapporteer word en die beskuldigde moet by al die hofverskynings teenwoordig wees.
Die vermeende misdade het glo tussen Junie 2024 en Augustus 2025 tydens skoolure op die skoolterrein plaasgevind. Die misbruik het aan die lig gekom toe die kind se moeder opgemerk het dat haar kind vreemd geloop het en die kind haar van die voorvalle vertel het. Sy het die saak by die polisie aangemeld, wat tot die beskuldigde se arrestasie op 1 September gelei het.
Mantshadi Tumelo Ledwaba, die staatsaanklaer, het die borgtogaansoek teengestaan en aangevoer dat die beskuldigde ‘n vlugrisiko is en moontlike ernstige misdade teen ’n kind kan pleeg. Die landdros het egter uitsonderlike omstandighede bevind wat sy vrylating op borgtog geregverdig het. Die saak is vir die streekhof tot 24 Oktober uitgestel.
