WES-KAAP. – Yusuf Cassim, die adjunkminister van hoër onderwys en opleiding, het ingegryp om studente se klagtes oor die nasionale finansiële hulpskema vir studente (NSFAS) aan te spreek.
‘n Vergadering het op 14 Julie tussen Cassim en prof. Hlengani Mathebula, die administrateur van NSFAS, in Kaapstad plaasgevind. Verskeie probleme wat studente onder die adjunkminister se aandag gebring het, insluitend vertragings met toelaebetalings, is bespreek. Ná die gesprek is NSFAS-spanne na die Sentrale Universiteit vir Tegnologie (SUT) gestuur om studente in nie-geakkrediteerde verblyf met uitstaande betalings by te staan.
Cassim het sy kommer uitgespreek oor die lang wagtyd vir sogenaamde GAP-ondersoeke. Hoewel hy gesê het die ondersoeke is noodsaaklik om bedrog te voorkom en studente se geskiktheid te bevestig, is wagtye van tot vyf maande volgens hom onaanvaarbaar. NSFAS het aangedui dat akademiese data vir 4 138 studente nog uitstaande is, waarna Cassim die departement opdrag gegee het om universiteite te help om die inligting so gou moontlik beskikbaar te stel. Hy het ook erken dat daar beleidskwessies is wat aandag verg, waaronder die persoonlike versorgingstoelaag van R316, wat volgens studente onvoldoende is.
Cassim het gesê die hersiening van NSFAS se beleid en wetgewing bied ‘n geleentheid om dié kwessies aan te spreek. Tydens sy besoek aan NSFAS se oproepsentrum het Cassim ook kennis geneem van die lang wagtye om studente se navrae af te handel. Hy het gesê sy kantoor sal nou saam met NSFAS werk om reaksietye en dienslewering te verbeter.
Volgens NSFAS is daar tans geen uitstaande toelaebetalings nie, insluitend dié vir TVET-kollegestudente. Cassim het bygevoeg dat individuele klagtes wat sy kantoor ontvang, steeds na NSFAS vir verdere ondersoek verwys sal word.
