WES-KAAP. – Agt verdagtes is Maandagaand deur die polisie in Khayelitsha doodgeskiet en ‘n verdere vyf is in hegtenis geneem.
Brig. Novela Potelwa sê inligting is ontvang van ‘n transitoroof wat na bewering sou plaasvind, waarna verskeie eenhede die inligting opgevolg het. Daar is op die vermeende rowers in Town Two toegeslaan. Die verdagtes het op die polisie geskiet, wat teruggeskiet het. Agt verdagtes is noodlottig gewond en ‘n verdere vyf is in hegtenis geneem.
Potelwa sê die polisie het op sewe AK 47-aanvalsgewere, twee R5-gewere, ‘n R4-geweer, ‘n Dashprod-geweer, twee 9 mm-pistole, drie geïmproviseerde springstoflaaiers en verskeie magasyne en ammunisie beslag gelê.
Die Valke is tans besig met die ondersoek.
