VENEZUELA. – Altesaam ses mense is dood toe die VSA Dinsdag ‘n boot naby die kus van Venezuela aangeval het wat daarvan verdink is dat dit dwelms vervoer.
Lees ook: VSA vernietig ‘dwelmboot’ van Venezuela – drie dood
Donald Trump het die aanval op sy Truth Social-platform bevestig en gesê sy verdedigingsekretaris, Pete Hegseth, het die aanval beveel. Hy het gesê “intelligensie het bevestig die boot het dwelms vervoer” en “dit was geassosieer met onwettige dwelmterrorisnetwerke”. Daar is geen bewyse uitgereik om die bewerings te ondersteun nie.
Dit is die vyfde aanval op bote van Venezuela sedert September. Altesaam 27 mense het tot dusver in die aanvalle omgekom.
‘n Mosie om te verhoed dat die Trump-administrasie die aanvalle sonder goedkeuring van die kongres uitvoer, het verlede week misluk toe dit nie genoeg stemme in die senaat gekry het nie.
Die president van Venezuela, Nicolas Maduro, het die VSA reeds verskeie kere daarvan beskuldig dat dit probeer om hom uit sy amp te verwyder.
Bronne: Euronews, CBS News, USA Today
Lees ook: VSA vernietig ‘dwelmboot’ van Venezuela – drie dood
