VRYSTAAT. – ‘n Bloedvlek tydens ondervraging op ‘n verdagte (20) se skoen het tot ‘n deurbraak in die ondersoek na ‘n vrou (87) se moord gelei.
Elsie Mutsi is op 4 Januarie in Phahameng, Bultfontein, met steekwonde aan haar rug en nek in ‘n plas bloed in ‘n buitetoilet aangetref. Sy is op die toneel dood verklaar.
Kapt. Loraine Earle sê tydens die ondersoek het die polisie kritiese inligting oor die misdaad van die gemeenskap ontvang. In opvolging van die inligting is polisielede van Welkom se teenbende-eenheid Vrydag na ‘n huis in Naledi gelei waar ‘n verdagte by sy meisie se huis ondervra en die bloedvlek op sy skoen opgemerk is. Na verdere ondervraging is die verdagte gearresteer en vir moord aangekla.
