WES-KAAP. – Die Strand Patrol Buurtwag / NHW Helderberg het ’n dringende waarskuwing uitgereik oor ’n man wat glo mense op Kusweg in die Strand teister en in gevaar stel.
KC Gericke van die buurtwag sê die man, beskryf met donker hare, wat dikwels met ’n kombers rondloop, word daarvan beskuldig dat hy voetgangers stamp, drawwers laat struikel en selfs babastootwaentjies gryp. ’n Voorval waarin ’n vrou glo gestamp is, is onlangs aangemeld.
Die publiek word versoek om enige voorvalle by die polisie aan te meld en sake oop te maak. Die buurtwag beklemtoon dat die oopmaak van sake noodsaaklik is om teen die man te kan optree en die veiligheid van die publiek op die kuspad te verbeter. Inwoners word aangemoedig om saaknommers met die buurtwag te deel. Volgens die buurtwag kan min gedoen word sonder die amptelike saaknommers. Moontlike aanklagte wat oorweeg kan word, sluit in aanranding, poging tot aanranding, crimen injuria ens. In ernstiger gevalle, waar iemand beseer word, kan dit ook aanranding met die doel om ernstige liggaamlike besering te veroorsaak, wees.
Indien ‘n saak oopgemaak is, kan die inligting na 082 805 8056 gestuur word.
