Carmi Louw (9) van Kathu is op 4 April, tydens ‘n vakansie in Chintsa in die Oos-Kaap, deur ‘n pofadder gebyt. Ná hospitalisasie in die Life Beacon Bay pediatriese intensiewesorgeenheid in Oos-Londen, is sy Saterdag ontslaan, nadat sy met haar voetjie plat kon loop.
Eduanne Niemand van Boland Snake Removals 24/7 and Pest Control sê Carmi is ontslaan en het sy waardering uitgespreek teenoor haar ouers vir hul volgehoue liefde, geduld en daaglikse terugvoer oor haar toestand. Hy het voorts gesê dat hy eendag by Melanie en Jaco, Carmi se ouers, in Kathu sal gaan kuier om die “beste ouers” te kan ontmoet. Die publiek is vir hul gebede en ondersteuning bedank wat volgens hom ’n groot rol in Carmi se herstel gespeel het. “Liewe Carmi as jy terug gaan skool toe, gaan die maatjies aan jou lippe hang as jy jou verhaal vertel, jy moet jou been oppas en vinnig gesond word.”
Carmi is op 3 April hospitaal toe gehaas nadat sy deur ‘n pofadder aan haar kuit gebyt is, wat tot ernstige swelling gelei het. Dokters moes vinnig ingryp om druk te verlig en haar bloedsomloop te beskerm, waarna sy in intensiewe sorg opgeneem is en verdere behandeling ontvang het. Ten spyte van intense pyn ná die voorval, het haar toestand geleidelik verbeter. Dokters kon haar wonde uiteindelik suksesvol in die teater toemaak sonder ’n veloorplanting, waarna haar herstel goed gevorder het.
Die voorval het groot reaksie ontlok, met mense regoor die land wat ondersteuning en gebed op Niemand se blad aangebied het.
