KAAPSTAD – Die Springbok-vrouesewes het duur betaal vir ‘n gebrek aan dissipline toe hulle Saterdag in die eindstryd van die Wêreldrugby-HSBC-sewes-uitdaagtoernooi in Kaapstad met 17-0 teen Kenia verloor het.
Volgens afrigter Renfred Dazel het die span se vertoning in die halfeindstryd teen Tsjeggië ‘n impak gehad op hul prestasie in die eindstryd. Die Bok-vrouesewes het Vrydag albei hul poelwedstryde gewen en moes hard werk vir ‘n oorwinning teen Tsjeggië voordat hulle in die laaste wedstryd gesukkel het om momentum te bou.
“Ek dink vir ons was dit natuurlik belangrik om goed te vaar in hierdie toernooi waar ons verlede naweek derde geëindig het. Dit is ‘n beter posisie, maar die meisies is baie teleurgesteld in die manier waarop ons in die eindstryd gespeel het,” het Dazel gesê.
Die span het in die halfeindstryd vier geelkaarte gekry, wat hul spel gedestabiliseer het. In die eindstryd kon hulle nie besit behou nie en het sodoende hul kanse op goud verspeel.
Na afloop van die twee toernooie in Suid-Afrika is Kenia boaan die punteleer met 40 punte, gevolg deur Suid-Afrika (34), Argentinië (30) en Colombia (30). Individueel is Nadine Roos tans die topskakel met 74 punte oor die reeks.
Die volgende uitdaagtoernooi vind op 11 en 12 April in Krakow, Pole, plaas.
