MPUMALANGA. – Twee mans en een vrou is Vrydagoggend op slag in ’n kop-aan-kop-botsing tussen ’n Sprinter-minibus en ’n Quantum-minibustaxi op die pad tussen die R555 en Mandelarylaan in Middelburg dood. ’n Ligte afleweringsvoertuig was ook by die ongeluk betrokke.
Moeti Mmusi, woordvoerder vir die departement van gemeenskapsveiligheid, sekuriteit en skakeling, sê in ‘n verklaring die drie oorledenes was passasiers in die taxi’s. Ten minste 14 ander mense, insluitend een bestuurder, het ernstige beserings opgedoen. Drie persone, onder wie die bestuurder van die ligte afleweringsvoertuig, is lig beseer.
Volgens inligting het die insittendes van die minibus van Mhluzi gekom en was op pad werk toe by een van die myne in Middelburg. Die gewondes is deur nooddienste na hospitale in Middelburg vervoer.
Die oorsaak van die ongeluk is nog nie bevestig nie, maar roekelose en nalatige bestuur kan nie in hierdie stadium uitgesluit word nie.
