NOORDWES. – Molefi Tshele (37), Joseph Sithole (37) en Vusi Nkambule (41) het gister vir verskeie aanklagte vir beweerde misdade waar koerierdiens-bakkies beroof is in die Rustenburg-landdroshof verskyn.
Lt.kol. Amanda Funani sê die verdagtes het vir klagtes van gewapende roof, poging tot moord, die besit van vermoedelik gesteelde eiendom en die onwettige besit van vuurwapens en ammunisie in die hof verskyn. Die saak is vir formele borgtogaansoek tot 19 Februarie uitgestel. Die verdagtes bly in aanhouding.
Na bewering het die verdagtes, wat glo ‘n Toyota Quntum en Nissan NP200-bakkie gery het, volgens inligting drie koerierdiens-bakkies wat onderweg na Rustenburg was, op die Kroondalpad vasgekeer. Die bestuurder, wat die koerierdiens-bakkies begelei het, is geskiet en is eers later na ‘n hospitaal geneem.
Die verdagtes het goedere wat vir aflewering bedoel was, soos selfone, tablette en ander items, gesteel en van die toneel gevlug. Hulle is glo gesien toe hulle by die bogenoemde adres inry.
Inligting is ontvang en tydens ‘n operasie op 6 Februarie is die verdagtes by ‘n huis in die Mfidikwe-woonbuurt, waar ‘n skietery eers uitgebreek het, in hegtenis geneem. Drie van die verdagtes is binne die huis in hegtenis geneem, terwyl ‘n vierde verdagte nog op vrye voet is.
Al die gesteelde items is teruggekry.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
