GAUTENG. – Die Gautengse provinsiale regering het Donderdag in ’n verklaring gesê dat die Gauteng-verkeerswagte ’n wettige en geregverdigde misdaadvoorkomingsinisiatief is en dat hul bestaan in ooreenstemming is met nasionale wetgewing. ‘n Verklaring is gemaak nadat lt.genl. Nhlanhla Mkhwanazi, die KwaZulu-Natalse polisiekommissaris, tydens ’n parlementêre ondersoek na polisie-korrupsie die wetlikheid van die eenheid bevraagteken het.
Die Gautengse regering sê die bewering dat die verkeerswagte onwettig is, is ongegrond en “’n wanvoorstelling van die feite”. Die regering beklemtoon dat die minister van justisie en korrektiewe dienste, Ronald Lamola, reeds in Desember 2023 die misdaadvoorkomingsbeamptes amptelik as vredesbeamptes ingevolge Artikel 334 van die Strafproseswet van 1977 aangewys het. Hierdie aanwysing gee hulle dieselfde regsstatus as Gautengse verkeersbeamptes.
Die provinsiale regering sê die projek is geskep om die Suid-Afrikaanse Polisiediens by te staan, nie om dit te vervang of te ondermyn nie. Die verkeerswagte fokus hoofsaaklik op townships, informele nedersettings en werkerswoonplekke, waar hulle sigbare polisiëring bevorder en vinniger reaksietye verseker. Die model volg soortgelyke strukture wat reeds in ander provinsies toegepas word, soos die Wes-Kaapse LEAP-program, wat ook plaaslik befondsde wetstoepassingseenhede gebruik om saam met die SAPD en metropolisiëringsdienste te werk.
Volgens die regering is die projek ontwikkel in reaksie op ’n tekort aan polisielede in Gauteng, waar statistieke toon dat daar slegs een polisielid vir elke 541 inwoners is.
“Die karakterisering van die Gautengse verkeerswagte as ‘onwettig’ ignoreer die grondwetlike plig van die provinsie om sy inwoners te beskerm,” sê die verklaring verder. “Hulle is ’n wettige, grondwetlik gemandateerde eenheid wat binne die raamwerk van samewerkende regering funksioneer.”
Druk hier om die volledige verklaring te lees.
