WES-KAAP. – Die Nasionale Kernreguleerder (NNR) het bevestig dat geen radioaktiewe materiaal in die omgewing vrygestel is tydens drie afsonderlike besmettingsvoorvalle wat onlangs by die Koeberg-kernkragstasie buite Kaapstad plaasgevind het nie.
Volgens Gino Moonsamy, woordvoerder vir die NNR, het die voorvalle op 30 Junie, 2 Julie en 7 Julie tydens instandhoudingswerk plaasgevind, nadat ventilasie-eenhede krag verloor het. Dit het gelei tot verhoogde radioaktiewe lugbesmetting binne die aanleg, maar die besoedeling is in al drie gevalle binne die aanleg ingeperk en het nie na die buite-omgewing versprei nie. Werknemers wat moontlik aan bestraling blootgestel is, is ondersoek.
Die NNR sê die vlakke van radioaktiewe blootstelling wat aangeteken is, was laer as die bestraling waaraan iemand tydens ‘n tandheelkundige X-straal blootgestel word. Die reguleerder beklemtoon dat die voorvalle nie as ‘n kern- of radiologiese noodsituasie geklassifiseer is nie en geen risiko vir die publiek of die omgewing ingehou het nie. Die NNR doen egter verdere inspeksies om die voorvalle volledig te ondersoek.
Koeberg, sowat 40 km noord van Kaapstad, is Afrika se enigste kommersiële kernkragstasie en word deur Eskom bedryf. Die aanleg voorsien ongeveer 5% van Suid-Afrika se elektrisiteit en het onlangs toestemming gekry om sy twee reaktore vir nog 20 jaar ná hul oorspronklike lewensduur te bedryf.
