VRYSTAAT. – ‘n Huiseienaar in Môrewag, Kroonstad, het Sondagoggend in die vroeë ure ‘n vermeende inbreker met ‘n byl in sy spore tot stilstand gedwing.
Kapt. Loraine Earle het aan Nuusflits bevestig dat die polisie omstreeks 01:20 na die toneel ontbied is.
“Terwyl hy die huis deur die venster ingegaan het, het die eienaar hom na bewering met ‘n byl op die kop geslaan.”
Die onbekende verdagte is met die byl steeds in sy kop na ‘n plaaslike hospitaal geneem en is later na ‘n hospitaal in Bloemfontein oorgeplaas. Earle sê die man het vanoggend aan sy beserings gesterf.
Die polisie het ondersoeke vir beide huisbraak en moord geopen.
