NOORD-KAAP. – Sewe verdagtes is Dinsdagoggend in Beaconsfield, Kimberley, tydens ‘n roetine stop-en-deursoeking deur die polisie in hegtenis geneem, toe hulle met items wat vermoedelik by die plaaslike poskantoor gesteel, betrap is.
Kol. Cherelle Ehlers, polisiewoordvoerder, sê in ‘n verklaring die verdagtes, ses mans en een vrou, tussen 25 en 32 jaar oud, word van die besit van vermoedelik gesteelde goedere en sake-inbraak aangekla. ’n Voorlopige ondersoek dui aan ’n inbraak het by ‘n poskantoor in Kimberley plaasgevind.
Die polisie het op ’n verskeidenheid kantoorbenodigdhede met ’n geraamde waarde van R16 000 beslag gelê. Ondersoeke duur voort.
Ehlers sê die polisie sal met die naderende feesseisoen voortgaan om misdaad in hoërisikogebiede aan te spreek en misdaadvoorkomingspogings te versterk.
