MPUMALANGA. – Die kinders van ‘n vrou (39) het Sondag op Wakkerstroom hulle ma se liggaam op ‘n bed gesien lê toe hulle deur die venster geloer het nadat hulle nie die kamerdeur kon oopkry nie. Daar was ‘n man (32) by haar.
Lt.kol. Jabu Ndubane sê Wakkerstroom-polisie het ‘n dubbelmoordsaak geopen, waarna ‘n verdagte (38) kort na die insident gearresteer is. Die verdagte sal na verwagting Dinsdag op twee moordaanklagte in die Volksrust-landdroshof verskyn.
Ndubane sê die kinders het omstreeks 07:00 wakker geword en wou in hulle ma se kamer ingaan. Toe hulle besef die kamer is gesluit en hulle kry geen reaksie van haar nie, het hulle van buite af deur die venster geloer en haar liggaam gesien. Bure is ontbied en beide die vrou en die manspersoon is dood aangetref. Die polisie en nooddienste is ontbied.
Die vrou, wat halfnakend was, het geen sigbare beserings gehad nie, maar die man het sigbare wonde gehad. Beide is dood verklaar. Die voorlopige ondersoek dui aan die vrou kon moontlik verwurg gewees het en die man is met ‘n skerp voorwerp gesteek. ‘n Saak met twee aanklagte van moord is geopen en die oorledenes se families is van hulle afsterwe in kennis gestel.
Maj.genl. Zeph Mkhwanazi, die waarnemende provinsiale kommissaris van Mpumalanga, het die polisielede wat die verdagte vinnig in hegtenis geneem het, geprys. Hy herinner die publiek daaraan om professionele hulp vir huishoudelike probleme te kry.
