KWAZULU-NATAL. – ’n Man is in hegtenis geneem op aanklagte van moord op sy ouma (83) Maandagaand by ‘n huis in Hexham, Phoenix, en poging tot moord op sy ma (60), wie se keel gesny is.
Reaction Unit South Africa (Rusa) sê die ouma is met veelvuldige steekwonde aan haar kop, gesig en liggaam op die toneel dood verklaar. Die beskuldigde het na bewering ook sy moeder aangeval en haar keel met ’n groot slagtersmes gesny. Sy is op die toneel gestabiliseer en is steeds in ’n kritieke toestand in ‘n hospitaal. Die ligging van die hospitaal word nie bekend gemaak nie.
Phoenix-polisiespeurders het volgens Rusa Woensdagoggend verklarings van Rusa-lede aangevra. Dit volg ná die ernstig beseerde vrou haar seun as die aanvaller geïdentifiseer het, terwyl paramedici haar probeer stabiliseer het. Terwyl die ondersoek voortduur word kritieke inligting en foto’s van die publiek weerhou.
Rusa sê die verdagte is deur die polisie in hegtenis geneem. Rusa-pesoneel was egter nie by die inhegtenisneming betrokke nie.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
