Videokrediet: Onbekend
KWAZULU-NATAL. – Die bestuurder van ‘n ligte afleweringsvoertuig, vermoedelik in sy 50’s, is vanmiddag omstreeks 13:00 in ‘n ongeluk dood. Sy voertuig was met twee vragmotors op die N3 rigting Pietermaritzsburg op die Ashburton-afrit in ‘n ongeluk betrokke.
Garrith Jamieson van ALS Paramedics sê hulle het oproepe van die ongeluk ontvang en moes teen die verkeer tot by die ongelukstoneel beweeg, aangesien die pad in ‘n noordelike rigting in sy geheel gesluit was.
Paramedici het gevind die bakkie en twee vragmotors was in ‘n botsing van agter betrokke. Triage is gedoen. Daar is gevind die bestuurder van die bakkie, wat erg vasgekeer was, is noodlottig beseer en hy is dood verklaar.
Jamieson sê die hele N3 in die rigting van Pietermaritzburg is vir verkeer gesluit.
Die oorsaak van die ongeluk sal deur die polisie, wat op die toneel teenwoordig is, ondersoek word.
