Waarskuwing! Die beeldmateriaal kan sensitiewe lesers ontstel.
GUAYAQUIL. – ’n Rooms-Katolieke priester is dood nadat ’n groot houtkruis tydens ’n mis wat regstreeks op sy eie sosiale media uitgesaai is, op sy kop geval het. Vader Patricio Alfredo Sánchez Molinari (53) het Saterdag 17 Oktober die mis by die Nuestra Señora del Perpetuo Socorro-kerk in Guayaquil, Ecuador, gelei toe die swaar kruis skielik van die muur agter die altaar losgekom en op hom geval het.
Die voorval is tydens die uitsending op beeldmateriaal, wat hierbo aan die heel einde gesien kan word, vasgelê. Die aartsbisdom van Guayaquil het Sánchez Molinari se dood bevestig en meegevoel met sy familie, vriende en geloofsgemeenskap uitgespreek.
Volgens berigte het die priester voor die altaar gestaan en die gemeente toegespreek toe die kruis hom van agter tref en hom teen die kateder laat val. Gemeentelede het om hulp geroep en hulle na hom gehaas.
Molinari was ’n lid van die Redemptoriste, ’n Katolieke godsdienstige orde. Die ongeluk het wêreldwyd aandag getrek nadat beeldmateriaal van die regstreekse uitsending op sosiale media versprei is.
Bronne: Patricio Alfredo Sánchez Molinari Facebook, CBS News, El Universo, The Catholic Sun
