VRYSTAAT. – ‘n Ma (43) en haar twee jong kinders, onderskeidelik 3 en 8 jaar oud, het Saterdagoggend vroeg in ‘n brand in ‘n shack in Bloemspruit omgekom.
Sers. Mahlomola Kareli sê die polisie is omstreeks 02:45 na die toneel waar ‘n shack deur ‘n brand vernietig is. Die drie liggame is binne-in die uitgebrande struktuur aangetref. Die ma en haar kinders is op die toneel dood verklaar.
‘n Voorlopige ondersoek dui aan die brand kon deur ‘n brandende kers in ‘n kamer, waar ‘n ouer seun gewoonlik slaap, veroorsaak gewees het. Dié seun was na bewering nie by die huis toe die brand uitgebreek het nie, maar met sy teruggekeer het hy die brand gesien en hulp gesoek. Bure het sonder sukses probeer om die brand met bakke water te blus.
‘n Geregtelike doodsondersoek is geopen om die omstandighede van die brand vas te stel.
