MPUMALANGA. – ’n Man is Saterdag in die Barberton-omgewing in hegtenis geneem, ná bewerings van bestialiteit wat deur die Nelspruit DBV ondersoek is.
Volgens die Nelspruit DBV is die saak begin nadat hulle ’n anonieme e-pos ontvang het met bewerings van seksuele dieremishandeling, asook videomateriaal wat die voorvalle sou toon. Inspekteurs Lize Pienaar en Michelle Steyn het dadelik ondersoek ingestel en later ’n deursoekingslasbrief bekom voordat hulle na die eiendom saam met die polisie is. By die perseel is die verdagte aangetref en die eiendom deursoek. Ses honde is verwyder en in beskermende bewaring geplaas, waar hulle deur ’n veearts ondersoek is.
Die verdagte is deur die polisie in hegtenis geneem en word aangehou terwyl die ondersoek voortduur. ’n Saak is oopgemaak ingevolge toepaslike wetgewing oor dieremishandeling. Die DBV het die samewerking van die polisie en ander rolspelers bedank en beklemtoon dat dieremishandeling in geen vorm geduld sal word nie.
