KWAZULU-NATAL. – ‘n Man (42) is vanoggend in sy kamer in ‘n buitegebou by ‘n huis in Trenance Park doodgeskiet.
Reaction Unit South Africa sê die voorval het vanoggend vroeg in Fase 2 gebeur. Die operasionele sentrum het ‘n oproep vir hulp van ‘n familielid ontvang, waarna reaksiebeamptes en paramedici na die toneel is. Die man is met ‘n skietwond aan sy kop in sy kamer aangetref.
“Volgens ‘n getuie het drie insittendes van ‘n wit Toyota Corolla (model en registrasienommer onbekend) die huis genader en skote afgevuur terwyl hulle in die erf staan. Hulle het toe die oorledene se kamer binnegegaan en hom geskiet voordat hulle in ‘n onbekende rigting gevlug het.”
Rusa sê vier 9mm-patroondoppies is op die toneel gevind.
Die motief vir die moord kon nie bevestig word nie.
