WES-KAAP. – Duane Singrew (47) is deur die George-hooggeregshof tot lewenslange tronkstraf gevonnis vir die moord op sy vrou, Joan Singrew (54), nadat sy in 2024 as vermis aangemeld is.
AO Christopher Spies sê die vrou is op 21 November 2024 by die polisie as vermis aangemeld nadat sy nie huis toe teruggekeer het nie. ’n Grootskaalse soektog is met die hulp van verskeie polisie-eenhede en tegnologie soos kameras en nommerplaat-herkenning van stapel gestuur. Die ondersoek het speurders op 25 November 2024 na Groot-Brakrivier geneem waar haar liggaam in ’n sloot gevind is. Sy het ernstige beserings aan haar kop en nek opgedoen wat deur stomp geweld veroorsaak is.
Verdere ondersoek het die polisie na haar woning in Rosemore gelei, waar die misdaadtoneel deeglik ondersoek is. Haar man en sy neef, Heinrich Jumat (46), is later in hegtenis geneem nadat dit aan die lig gekom het dat die neef glo gehelp het om van die liggaam ontslae te raak.
Die hof het albei mans verlede maand op aanklagte skuldig bevind. Jumat is 15 jaar tronkstraf opgelê. Albei is ook vir regsverydeling tot 10 jaar gevangenisstraf gevonnis.
