MIDDELBURG, MPUMALANGA. – Deon Cornelius, die eienaar van uBhetyan-o-Africa Lodge, het Maandag ’n gedeelte van sy een vinger verloor nadat ’n mak hiëna hom aan die hand gebyt het.
Volgens Cornelius was hy besig om ’n elektriese heining op die plaas reg te maak. Die mak hiëna genaamd Ed, het glo teen hom geskuur.
Hy het die hiëna weggestoot, maar is toe gebyt. Hy het Ed se kake van sy hand afgekry en is dadelik hospitaal toe.
’n Gedeelte van sy vinger moes geamputeer word en die wonde is in die teater skoongemaak. Nog ’n vinger het erge skade opgedoen en die moontlikheid van amputasie bestaan indien die behandeling nie suksesvol is nie.
Cornelius is uit die hospitaal ontslaan, maar sal opvolgbehandeling vir infeksie moet ontvang.
Bronne: Laevelder, Caxton
