KWAZULU-NATAL. – Ayanda Fulela (29) is vir die moord in Desember 2024 op sy ouma (72) en lykskending tot lewenslange tronkstraf en addisioneel 10 jaar deur die Greytown-streekhof gevonnis.
Konst. Siyabonga Nkwanyana sê die moord is op die betrokke datum in Nseleni, in die Kranskop-polisiëringsgebied, gepleeg. Die ouma is op 2 Januarie 2025, nadat sy reeds vir twee dae weg was, as vermis aangemeld.
Speur.sers. Thobelani Khoza van Kranskop-speurtak het ‘n ondersoek geloods. Navrae het die speurders na die klaer se huis gelei, waar die bewyse na die kleinseun as die verdagte gewys het. Met ondervraging het die kleinseun beken hy het ‘n argument met sy ouma gehad en hy het haar met ‘n skerp voorwerp gesteek, waarna hy haar liggaam aan die brand gesteek het.
Nkwanyana sê Fulela is op 4 Maart aan die misdade skuldig bevind. Fulela is Vrydag vir moord en lykskending gevonnis en is verder onbevoeg verklaar om ‘n vuurwapen te besit.
