Jacobus Barendse (59) en Ashley Diergal (45) is effektief tot lewenslange tronkstraf gevonnis vir die moord op die 82-jarige Reginald Arthur Gordon, wat op 22 Februarie 2019 in die Strand plaasgevind het.
Die hooggeregshof het hulle ook skuldig bevind op aanklagte van huisbraak en roof met verswarende omstandighede. Barendse is verder skuldig bevind aan regsverydeling, en die vonnisse sal gelyktydig uitgedien word.
Volgens Eric Ntabazalila, woordvoerder van die Nasionale Vervolgingsgesag (NVG), het Gordon saam met Alton de Wet en sy verloofde, Arista Coetzee, in die Strand gewoon. Barendse, wat deur Gordon vir werk by die huis aangestel is, het op die dag van die moord vir Diergal gevra om hom na die huis te vergesel. Hulle het oor ’n muur gespring en die huis deur ’n venster betree. Terwyl hulle die huis geplunder het, het hulle Gordon binne gevind.
“Dit is in hierdie stadium waar dit modderig raak, aangesien beide beskuldigdes mekaar vir die wrede moord blameer,” sê Ntabazalila. Gordon se liggaam is vasgebind, sy mond was met ’n kussing bedek en sy liggaam met bloed deurdrenk.
Barendse en Diergal het met televisiestelle, juwele, kontant en Gordon se bakkie gevlug. Hulle het een van die televisiestelle by ‘n taverne in Lwandle verkoop. Buite die taverne het Barendse in ’n bakleiery met bendelede betrokke geraak en hulle is van hul buit beroof. Diergal het gevlug toe hy deur ’n bendelid met ’n vuurwapen gedreig is en het die bakkie daarna na ‘n plaaslike werktuigkundige geneem, wat tussen R800 en R1 000 betaal is om die nommerplate te verander. Die werktuigkundige het later ‘n staatsgetuie geword.
Barendse het ook die bakkie saam met ‘n ander vriend gebruik om mense tussen die Strand en Swellendam te vervoer, om geld te maak. Die polisie kon die voertuig se bewegings tussen 22 Februarie 2019 en 24 Februarie 2019 met behulp van die nommerplaatherkenningstelsel opspoor. Barendse is op 26 Februarie 2019 buite sy werkgewer se huis in hegtenis geneem. Hy het later sy misdade erken en Diergal betrek.
Barendse, ‘n selferkende dwelmgebruiker, het voorts sy broer besoek, waar hy die voertuig se kappie gelaat het. Die broer het ook in die saak getuig.
Adv. Nicolette Bell, direkteur van openbare vervolging in die Wes-Kaap, het die wrede moord op Gordon skerp veroordeel en beklemtoon dat elke lewe waardevol is. “Ons sal kragtig optree in ons strewe om hierdie sake te vervolg, as ’n sterk afskrikmiddel vir toekomstige moordenaars,” het sy gesê.
