KWAZULU-NATAL. – Drie mans verskyn weer in die KwaDukuza-landdroshof in verband met die moord op sewe lede van dieselfde familie ná hul ontvoering in April vanjaar. Volgens die klagstaat is die slagoffers op 21 April in Newark ontvoer, waarna hul liggame dae later in Melmoth gevind is. Die oorledenes was tussen 20 en 83 jaar oud.
Die oorledenes is geïdentifiseer as Alan Monswamy, sy vrou Sandy, hul kinders Kraidon en Shamarie, asook familielede Cliffy Padayachee, Mooniamma Padayachee en Mariamma Appanah.
Natasha Ramkisson-Kara, NVG-woordvoerder, het bevestig dat die saak steeds voortduur en dat ondersoeke nog nie afgehandel is nie. Linda Blessing Mthiyane (28), Bongumenzi Mpungose (26) en Mthandeni Luyanda Mthiyane (21) het hul tweede hofverskyning gemaak. Hulle staan tereg op aanklagte wat verband hou met die ontvoering en moord op sewe familielede, asook huisbraak met die doel om te roof en roof met verswarende omstandighede. Mpungose word ook deur ’n bykomende aanklag van verkragting in die gesig gestaar, terwyl Mthiyane aangekla word van die onwettige besit van ’n vuurwapen.
Al drie beskuldigdes het vroeër hul borgtogaansoeke laat vaar, maar Mpungose het nou aangedui dat hy weer om borgtog wil aansoek doen. Die hof sal later ’n datum vir dié aansoek bepaal. Die saak is vir verdere ondersoek tot 31 Julie uitgestel.
