Brekende Nuus
Nuus

Meer as 3 500 vlugte in VSA op die grond gehou ná netwerkfout

Foto: Ter illustrasie

VSA. – Meer as 3 500 vlugte is Vrydag in die VSA op die grond gehou nadat ’n telekommunikasiefout lugverkeerbeheer se kommunikasie- en radarstelsels volgens die Amerikaanse departement van vervoer, ontwrig het. Die Federale Lugvaartadministrasie (FAA) het die landwye opstygverbod dieselfde aand opgehef. Lugrederye was teen Sondag steeds besig om hul skedules te herstel.

Die FAA sê die tegniese probleem het omstreeks 15:30 Amerikaanse Oostelike tyd ontstaan en lugverkeer is omstreeks 20:15 hervat. Die bevel het vertrek by lughawens regoor die land geraak. Vliegtuie wat reeds in die lug was, kon steeds land. Die departement het geen syfers per lughawe bekend gemaak of aangedui hoeveel vliegtuie op enige gegewe tydstip op die grond gewag het nie.

Volgens die departement van vervoer het meer as 8 000 vlugbewegings Vrydagaand plaasgevind nadat die bevel opgehef is. Dié syfer dek bedrywighede oor die loop van die aand.

Die FAA het afsonderlik gesê dat sowat 12 462 vlugte Vrydag gekanselleer is, waaronder 9 082 deur groot lugrederye. Dié dagtotaal sluit ook kansellasies in wat nie direk aan die opstygverbod toegeskryf is nie. American Airlines het Saterdagaand gesê hy werk daaraan om vliegtuie en bemannings weer op die regte lughawens te kry en dat individuele vlugte tydens die herstel steeds gekanselleer kan word. 

Die probleem het tydens die roetinevervanging van ’n netwerkroeteerder by ’n afgeleë fasiliteit ontstaan. Ouer toerusting het onstabiel geraak toe die netwerk sowat 1 000 verbindingspogings elke vier tot vyf sekondes begin ontvang het. Dit het kommunikasie met vliegtuie en die toevoer van radardata ontwrig. Die FAA het die betrokke funksie afgeskakel op die roeteerders waar die probleem ontstaan het en dit as voorsorg ook op sowat 60 soortgelyke roeteerders gedeaktiveer.

Bronne: Federale Lugvaartadministrasie, Amerikaanse departement van vervoer, American Airlines, WIRED