BERKELY, KALIFORNIË. – Navorsers aan die Universiteit van Kalifornië het bevind mense het vir duisende jare saam met Neanderdalmense in die noordweste van Europa bestaan.
Navorsingsartikels hieroor het onlangs in die tydskrifte Nature en Nature Ecology and Evolution verskyn.
’n Nuwe argeologiese terrein in Duitsland het onder andere beenfragmente van Homo sapiens en steentydperktoerusting wat ook aan hulle behoort het, opgelewer. Daar is vroeër geglo die toerusting het aan Neanderdalmense behoort. “Uitgrawings toon dat die oorblyfsels deel van die vroeë Homo sapiens se eerste toerusting was,” sê Elena Savala, een van die navorsers aan die universiteit.
Volgens die navorsing is daar bewyse dat Homo sapiens en Neanderdallers langs mekaar geleef het. Dit stem ooreen met DNS-bewyse dat die twee spesies saam voortgeplant het.
Die navorsing bevestig dat Homo sapiens die noordwestelike dele van Europa bereik het nog voordat Neanderdalmense uit die suidwestelike dele van Europa verdwyn het.
Bronne: Science Daily, Nature-joernaal, Nature Ecology and Evolution
