WES-KAAP. – Die polisie se *SECI-eenheid en die VSA se Department van Homelands Security het verlede week saamgewerk om nog drie verdagtes vir beweerde internetverwante seksuele misdade met kinders (kinderpornografie) vas te trek. ‘n Man (53) van Worcester is Woensdag, nog ‘n man (40) van Kraaifontein Donderdag en ‘n derde ‘n man van Mitchells’s Plein (32) Vrydag in hegtenis geneem.
Brig. Athlenda Mathe sê onder die verdagtes is ‘n man wat homself glo as ‘n tiener voorgedoen het om minderjarige meisies na ‘n geselsgroep te lok.
Dit bring die aantal inhegtenisnemings as gevolg van ‘n internasionale operasie om die opsporing van vervaardigers, gebruikers en verspreiders van kinderpornografie op te spoor op sewe te staan. Sedert November 2023 is drie verdagtes in Gauteng en een in KwaZulu-Natal vasgetrek.
Die drie verdagtes wat in die Wes-Kaap vasgetrek is, word deur verskeie klagtes in die gesig gestaar.
Die man van Worcester het glo 95 000 foto’s en 6 000 video’s in sy besit gehad. Hy word onder meer op klagtes van die beskikbaarstelling en verspreiding van kinderpornografie beskuldig.
Die man van Kraaifontein is met meer as 149 000 foto’s en meer as 5 000 video’s van kinderpornografie betrap. Hy het ook na bewering twee ongelisensieerde vuurwapens en verskeie kalibers ammunisie en nege slange waarvan drie nie wettige permitte gehad het, in sy besit gehad. Hy word van onder meer die besit van onwettige vuurwapens en ammunisie, sowel as die besit en verspreiding van kinderpornografie beskuldig.
Die Mitchell’s Plein-verdagte het glo minderjarige meisies na ‘n geselsgroep gelok waar naakfoto’s uitgeruil was.
Die verdagtes sal na verwagting in die Worcester-, Kraaifontein- en Mitchells Plein-landdroshowe verskyn.
*SECI – Serial and Electronic Crime Investigations
Bron: SAPD
