GAUTENG. – Die Stad Johannesburg se nooddienste waarsku teen die rook of opsetlike inaseming van brandblusserinhoud en sê dat dit ernstige gesondheidsprobleme kan veroorsaak, insluitend asemhalingsprobleme, stuiptrekkings en selfs die risiko van dood. ‘n Video-opname is op die nooddiens se Facebook-blad gedeel wat wys hoe jong mense ‘n brandblusser oopdraai en die inhoud “rook”.
Die Stad Johannesburg EMS sê in ‘n sosialemediaplasing brandblussers is veiligheidsapparaat en is nie bedoel vir menslike gebruik of inaseming nie. Ouers word aangeraai om hul kinders oor die gevare van die inaseming van brandblusserinhoud in te lig. Skole word aangemoedig om die Openbare Opvoedingseenheid van Johannesburg-nooddienste uit te nooi om brandveiligheidsprogramme aan te bied as deel van Lewens- en brandveiligheids-onderrig.
