STELLENBOSCH. – In ’n baanbrekende besluit het die Raad van die Universiteit Stellenbosch (US) aangekondig dat die Wilgenhof-koshuis in sy huidige vorm gesluit sal word. Dit volg na uitgebreide konsultasie en voorleggings oor die toekoms van die ikoniese koshuis.
Nicky Newton-King, voorsitter van die US-Raad, sê aan Nuusflits die universiteit is dankbaar vir die voorleggings wat ontvang is. Dit volg na skriftelike voorleggings vir Wilgenhof gevra is. Lees die berig hier.
Maties: waardes van inklusiwiteit, respek, uitnemendheid
“Dit is duidelik dat ’n inklusiewe proses, wat die US-bestuur, Wilgenhof-inwoners en ander studentegroepe betrek, van kritieke belang is om ’n koshuis te vorm wat die waardes van inklusiwiteit, respek en uitnemendheid weerspieël.”
Die koshuis sal in 2025 gesluit word vir opgraderings en heropen in 2026 as ’n manskoshuis wat die positiewe aspekte van Wilgenhof behou, maar afskeid neem van onaanvaarbare praktyke soos die Vleisfees en Nagligte. “Daar is geen plek vir geheimsinnige en onaanvaarbare tradisies in ’n moderne, waarde-gedrewe universiteit nie,” het Newton-King benadruk.
Skokkende onthullings lei tot besluit
Vroeër vanjaar het News24 skokkende onthullings oor beweerde ontstellende praktyke by dié koshuis gepubliseer. Dit sluit in kru tekeninge wat beweerde seksuele aanranding, swart kappies en ‘n giftige lynsaadolie-en-aalwynkristal-konkoksie uitbeeld. Die onthullings spruit uit ‘n oudit deur die universiteit se bestuur, wat twee geslote kamers gevul met kommerwekkende toebehore blootgelê het. Lees dié berig hier.
Die Raad het verder bevestig dat huidige Wilgenhof-inwoners wat aan akademiese vereistes voldoen, in 2025 in ander koshuise sal bly, met die opsie om in 2026 terug te keer. ’n Gefasiliteerde proses sal ook begin om die nuwe waardes en praktyke van die herverbeelde koshuis te definieer.
Moontlikheid van nuwe naam oorweeg
Die universiteit sal tydens hierdie oorgang psigososiale ondersteuning bied aan studente en personeel wat geraak word. Die moontlikheid van ’n nuwe naam vir die koshuis sal ook oorweeg word.
Newton-King het afgesluit: “Hoewel Wilgenhof se kultuur elemente van onafhanklike denke en kameraadskap bevorder, is die Raad dit eens dat daar geen plek is vir praktyke wat nie met die US se waardes en die Suid-Afrikaanse Grondwet strook nie.”
