Die nasionale vervolgingsgesag het besluit om nie Fundile Gade, die LUR vir onderwys in die Oos-Kaap, te vervolg nie. Dit volg nadat Gade vir Jaco Pieterse, die voormalige Bergview-kollegehoof, in ‘n Newzroom Africa-onderhoud valslik as ’n verdagte in die verkragting van ’n minderjarige uitgewys het. AfriForum se privaatvervolgingseenheid bevestig egter al vervolg die NVG nie, dat klagtes van crimen injuria, intimidasie en die oortreding van die wet op kubermisdade steeds teen Gade staande is.
Dié smeerveldtog het gevolg op bewerings van ‘n minderjarige meisie se ma dat haar dogter in Oktober 2024 by die skool in Matatiele verkrag is. Owerhede het bevestig dat die kind deur al die nodige prosesse by die Thuthuzela-sorgsentrum geneem is en deur minstens drie maatskaplike werkers gesien is. Dit is belangrik om te noem dat die NVG intussen bevestig het dat die kind volgehou het dat sy hardlywig is en nie verkrag of seksueel aangerand is nie. Daar was geen bewyse dat die kind gepenetreer is nie.
Barry Bateman, woordvoerder vir die privaatvervolgingseenheid, sê in ‘n verklaring alhoewel die polisie Pieterse nooit as ’n verdagte beskou het nie en die NVG reeds in 2024 bevind het dat geen bewyse van verkragting bestaan nie, was Pieterse steeds die teiken van ’n aanhoudende sosialemediaveldtog, wat sy reputasie en veiligheid ernstig geskaad het. Beide Pieterse en sy gade se loopbane het in die slag gebly.
Die NVG het op 5 November amptelik bekend gemaak dat Gade nie vervolg sal word nie. AfriForum het vroeër vanjaar strafregtelike klagtes teen Gade, sowel as teen Julius Malema en Fikile Mbalula, by die polisie ingedien. Die NVG het nog nie oor die laasgenoemde twee besluite geneem nie.
Volgens adv. Gerrie Nel is die NVG se besluit “irrasioneel” en beoog Pieterse om ’n nolle prosequi-sertifikaat te bekom sodat privaat vervolging kan volg. Die eenheid sê nuwe inligting uit parlementêre antwoorde bevestig dat die leerling nooit verkrag is nie en dat geen verdagte ooit deur die polisie geïdentifiseer is nie.
AfriForum bestudeer die dossier en sal binnekort formeel vir die sertifikaat aansoek doen.
Druk hier om meer te lees.
