Die strafsaak teen vyf mense wat daarvan beskuldig word dat hulle gewerf is om by die Russiese weermag aan te sluit, is Donderdag in die Kemptonpark-landdroshof tot 17 September uitgestel. Die staat het aangedui dat die ondersoek nog nie afgehandel is nie en dat verdere ontleding van elektroniese bewyse nodig is voordat die saak kan voortgaan.
Magaboke Mohlatlole, NVG-woordvoerder, sê Patricia Mantula (39), Xolani Ntuli (46), Thulani Mazibuku (24), Siphamandla Chabalala (23) en Sfiso Mabena (21) word aangekla ingevolge die wet op die regulering van buitelandse militêre bystand. Die vyf is vroeër by die OR Tambo Internasionale Lughawe in hegtenis geneem nadat wetstoepassers oor hul beplande reis inligting ontvang het. Volgens die staat was hulle onderweg deur die Verenigde Arabiese Emirate na Rusland toe hulle by die instaphek voorgekeer is nadat hul optrede agterdog gewek het.
Die vervolgingsgesag voer aan dat Mantula na bewering die reis- en ander reëlings vir die groep getref het om hulle in staat te stel om by die Russiese weermag aan te sluit. Die ander vier beskuldigdes is later as deel van die ondersoek in hegtenis geneem.
Die staat wag nou op die ontleding van data wat van selfone en ander elektroniese toestelle bekom is. Dié bewyse vorm deel van die ondersoek wat nog afgehandel moet word voordat die vervolging verder gevoer kan word. Mohlatlole sê die NVG werk steeds saam met die ondersoekspan om die uitstaande ondersoekwerk so spoedig moontlik af te handel sodat die saak sonder verdere onnodige vertragings kan voortgaan.
