Weg is die dae toe ons voorouers tot die geboorte moes wag om uit te vind of die nuweling in die gesin ’n seuntjie of ’n dogtertjie is. Vandag kan verwagtende paartjies met vierdimensionele sonars vinnig-vinnig die geslag van die baba sien. Sosiale media het vir seker bygedra tot die nuutste neiging van paartjies om die geslag van hulle babas op prettige maniere bekend te maak.
As jy kopkrap oor ’n uit-die-boks-idee om jou baba se geslag aan familie en vriende bekend te maak, is die volgende idees vir jou.
Idee 1: Skattejag
Indien jou familie en vriende avontuurlustig en aktief is, beplan ’n skattejag in julle tuin of leefarea. Steek oral leidrade weg wat uiteindelik tot die geslag van die baba sal lei.
Idee 2: Troeteldiere
Om jou viervoetige kinders by die swangerskap te betrek, kan julle vir hulle kostuums aantrek om die geslag uit te beeld.
Foto: Live Life Active Fitness
Idee 3: ’n Liedjie
As julle ’n musikale familie is, skryf ’n spesiale lied om die geslag oor te dra. Dit is ook iets om eendag vir julle kind te hou as hy of sy groot is.
Idee 4: Tuinlanterns
Stuur blou of pienk lanterns in die sterrenag op. Dit sal sorg vir ’n sprokiesagtige herinnering.
Foto: Brittany Morgan
Idee 5: Koek-“smash”
Hierdie is ’n goeie idee indien julle reeds ’n kleuter het. Bak ’n koek waarvan die binnekant blou of pienk is. Gee julle kleuter vrye teuels om die koek te “geniet”.
Of julle nou op ’n groot of klein onthullingsoomblik besluit, hou ’n kamera byderhand om die spesiale oomblik vir altyd vas te vang.
Bronne: Web Baby Shower, Style Craze
