GAUTENG. – Nooddienste is Maandagaand voor 22:00 na ‘n ontploffing op die 9de vloer van ‘n woonstelgebou in Meyerspark, in Pretoria ontbied.
Volgens Volunteer Emergency Medical Response Unit (VEMRU) het noodspanne met aankoms gevind dat die betrokke woonstel groot skade opgedoen het. Daar is bevestig dat die ontploffing ernstige skade aan die woonstel veroorsaak het, met vensters, deure en ingeboude kaste wat beskadig is. Fragmente wat vermoedelik van ’n gasbottel afkomstig is, is op die toneel gevind. Verskeie naburige woonstelle het ook skade gely, hoofsaaklik gebreekte vensters as gevolg van die skok.
Verskeie inwoners is vir die inaseming van onder meer stof op die toneel behandel, maar gelukkig is geen ernstige beserings aangemeld nie.
VEMRU herinner die publiek om gasbottels altyd volgens vervaardigerinstruksies te gebruik en gereeld pype, reguleerders en verbindings te inspekteer om lekkasies en moontlike ontploffings te voorkom. In geval van ’n vermoedelike gaslek moet die gebied onmiddellik ontruim en nooddienste gekontak word.
