WES-KAAP. – Makgothi Thobakgale, die nasionale kommissaris van korrektiewe dienste, het dringende ingryping weens ‘n reeks ernstige veiligheidsbreuke by Pollsmoor- korrektiewe sentrum aangekondig. In die jongste voorvalle is groot gebreke in kernprosesse soos die verifikasie van lasbriewe, hofverskynings en die identifikasie van gevangenes aan die lig gebring.
Onder die voorvalle tel die verkeerde vrylating van John Henry Mpelo, ‘n voorverhoor-aangehoudene. Inganathi “Thembalethu” Daba is onder ’n ander se identiteit vrygelaat, terwyl Jordan Adams rekordstelsels omseil het om ’n vals identiteit aan te neem. Al drie die aangehoudenes is later weer in hegtenis geneem, maar die voorvalle het duidelik gewys hoe kwesbaar die stelsel is.
Gedurende Julie is daar boonop meer as 110 selfone, simkaarte, dwelms, kontant en ander verbode items in ’n groot klopjag by Pollsmoor gevind.
Thobakgale sê daar is reeds ondersoeke aan die gang en dat daar beslis gevolge gaan wees vir personeel wat hul pligte verwaarloos het. Abel Mashaba en Michael Mafukata, twee senior amptenare, is intussen ontplooi om die bestuur oor te neem totdat die situasie genormaliseer is.
Volgens die kommissaris is Pollsmoor een van die land se vyf grootste korrektiewe fasiliteite en speel dit ’n strategiese rol in die Kaapse metropool. Hy sê enige onstabiliteit daar het ’n direkte uitwerking op wetstoepassing, die regbank en die veiligheid van gemeenskappe. Daarom, sê hy, is die ingryping noodsaaklik en nie onderhandelbaar nie.
Druk hier om meer te lees.
Bron: SAnews.gov.za
