GAUTENG. – Die Gautengse departement van gesondheid doen ’n dringende beroep op ouers en versorgers om hul kinders se inentings op datum te hou, nadat ’n duidelike daling in immuniseringsdekking in die provinsie voorgekom het.
Volgens die departement is ouers se rol deurslaggewend om kinders teen voorkombare siektes te beskerm, deur seker te maak hulle ontvang al hul inentings betyds volgens die nasionale skedule. Die waarskuwing kom tydens Afrika-inentingsweek. Amptelike syfers toon dat dekking onder kinders jonger as een jaar tot 75,3% gedaal het in 2025/26, vergeleke met 83% die vorige jaar. Die departement sê dié afname stel kinders bloot aan ‘n groter risiko vir siektes en komplikasies. Dit word deels toegeskryf aan ouers wat nie kinders vir roetine-inentings neem nie, of nie toestemming gee vir inentings deur skoolprogramme aangebied nie. Ouers word gevra om kinders wat agter is met hul inentings so gou moontlik na klinieke te neem.
Inentings bly een van die doeltreffendste maniere om ernstige siektes en sterftes te voorkom.
