PAKISTAN. – Die Balochistan Liberation Army het gesê as die Pakistanse veiligheidsmagte nie ophou om hulle aan te val nie, gaan hulle gyselaars begin doodmaak.
Lees ook: Pakistanse militante kaap trein vol passasiers
Die groep het gesê 10 gyselaars sal doodgemaak word as die veiligheidsmagte aanhou om hulle aan te val om die gyselaars te probeer bevry. Die groep het ook gesê as die weermag betrokke raak, sal al die gyselaars doodgemaak word.
Dit volg na die militante groep gister ’n trein, die Jaffar Express, met sowat 450 mense in ‘n tonnel gekaap het en geëis het politieke gevangenes en mense wat glo deur die weermag ontvoer is, moet binne 48 uur vrygelaat word. Bomplanters met “selfdood-baadjies” sit glo langs van die passasiers op die trein.
Sowat 155 gyselaars is gisteraand gered en omtrent 27 militante is in die proses dood. Die veiligheidsmagte het die trein omsingel en gebruik onder andere hommeltuie om die militante aan te val.
Bronne: Times of India, The Mirror, The Economic Times
