KWAZULU-NATAL. – Paramedici en veiligheidspersoneel is na bewering Saterdagmiddag deur die insittendes van ‘n motor in Ballito op ‘n ongelukstoneel aangerand nadat ‘n bakleiery tussen die insittendes van twee voertuie uitgebreek het.
Samantha Meyrick van IPSS Medical Rescue sê die diens is na die ongelukstoneel waar twee motorvoertuie betrokke was. Die insittendes van beide die voertuie het beserings opgedoen. Toe paramedici die ongelukstoneel wou verlaat, het die twee groepe insittendes van die voertuie glo begin baklei. IPSS Medical Rescue en Marshall Sekuriteit het probeer om die groepe uit mekaar te hou, toe daar na bewering skielik na hulle gedraai en hulle aangerand is.
Meyrick sê van die aangerande beamptes was nie aan diens nie, maar in die gebied en het met hulle families in hulle motors stilgehou om hulp te verleen. IPSS Medical Rescue en Marshall Sekuriteitsbeamptes is lig beseer en gaan sake van aanranding by die polisie aanmeld.
“Dit is afgryslike gedrag, deur die gebruik van alkohol aangevuur. Dit beklemtoon ook die risiko en gevare waarin nood- mediese dienste hulself dikwels bevind,” sê Meyrick.
