GAUTENG. – Drie Mosambiekse burgers, tussen 32 en 37 jaar, is Maandag in Kingsway, Springs, in hegtenis geneem nadat hulle met uitmekaargehaalde motorfietse aangetref is. Die motorfietse was vermoedelik vir Mosambiek bestem.
Lt.kol. Mavela Masondo, provinsiale polisiewoordvoerder, sê in ‘n verklaring aan Nuusflits die polisie het inligting ontvang oor die verdagtes wat glo in Kingsway in besit van vermoedelik twee gesteelde motorfietse is wat uitmekaargehaal en toegedraai is met die voorneme om dit later na Mosambiek te vervoer. ’n Operasie is geloods om die verdagtes te onderskep.
Masondo sê met aankoms by die adres is twee verdagtes aangetref wat glo ’n silwer Linex Yamaha Jet Ski toegemaak het en besig was om dit op ’n sleepwa te laai. Een verdagte het probeer vlug toe hy die polisie sien, maar is in hegtenis geneem. Nog twee motorfietse, wat in swart vullissakke toegevou is, is gekry. Die verdagtes was glo gereed om dit op ‘n wit Toyota Hilux-bakkie te laai wat aan ‘n sleepwa gekoppel was. Een van die motorfietse is vroeër in Cosmo City, Johannesburg, as gesteel aangemeld.
Die polisie vermoed dat meer verdagtes deel is van die sindikaat. Die verdagtes, wat in aanhouding is, sal na verwagting binnekort in die Benoni-landdroshof voorkom.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
