KWAZULU-NATAL. – Twee verdagtes wat gesoek was, is Dinsdagaand in ’n skietgeveg met die polisie in Inanda dood. Die twee verdagtes, onderskeidelik 20 en 21 jaar oud, is vir moord op ‘n polisielid, poging tot moord en ‘n reeks huis- en gewapende rooftogte gesoek.
Kol. Robert Netshiunda, polisiewoordvoerder, sê in ‘n verklaring die polisie het ‘n wenk oor die verdagtes se verblyfplek gekry, wat hulle na ’n huis in die Maplazini-gebied van Inanda gelei het. Met aankoms by die huis het die polisie hulleself geïdentifiseer en die verdagtes beveel om die deur oop te maak. Die verdagtes het egter vanuit die huis op die polisie geskiet, waarna die polisie uit selfverdediging teruggeskiet het.
’n Vuurwapen waarvan die reeksnommer verwyder is, is in hul besit gevind. Geen polisiebeamptes is tydens die voorval beseer nie.
