NOORDWES. – ’n Selfoon op ‘n misdaadtoneel het tot die inhegtenisneming van ’n 35-jarige man gelei in ‘n maande lange ondersoek ná ’n huisroof en verkragting in Februarie vanjaar in Mmabatho.
Kol. Anne Magakoe, polisiewoordvoerder, sê die deurbraak is gemaak nadat ondersoekers ’n belangrike leidraad wat op die misdaadtoneel agtergebly het, opgevolg het. Tydens die ondersoek het forensiese kenners ’n selfoon wat glo aan die verdagte behoort, op die toneel gevind en ontleed. Die inligting wat uit die toestel verkry is, het ondersoekers in staat gestel om die man met die misdaad te verbind. Lede van die eenheid vir gesinsgeweld,kinderbeskerming en seksuele misdrywe (GKS) het, met die hulp van die Brits-eenheid vir misdaadintelligensie en die Brits trio-taakspan, uiteindelik die verdagte uiteindelik en in hegtenis geneem.
Hy sal na verwagting Vrydag op aanklagte van huisroof en verkragting in die Mmabatho-landdroshof verskyn. Die ondersoek na die saak duur voort.
