OOS-KAAP. – Ses gewapende verdagtes is Maandag omstreeks 17:30 in ‘n skietery met die polisie op die R61 tussen Mthatha en Ngcobo doodgeskiet.
Brig. Nobuntu Gantana, provinsiale polisiewoordvoerder, sê in ‘n verklaring aan Nuusflits ‘n intelligensiegedrewe operasie is op individue, wat vermoedelik by afpersingsaktiwiteite in die gebied betrokke is, gemik. Volgens die polisie het hulle die voertuig voorgekeer, waarop die verdagtes uitgeklim en glo op die polisie begin skiet het. Lede van die polisie het uit selfverdediging teruggeskiet, wat tot die dood van al ses verdagtes gelei het. Die identiteite van die oorledenes is tans nog onbekend. Forensiese prosesse is aan die gang om hulle formeel te identifiseer.
Misdaadtoneeldeskundiges het die toneel vir bewyse gefynkam. Vuurwapens wat van die verdagtes af herwin is, sal aan ballistiese ontleding onderwerp word.
“Die Onafhanklike Polisieondersoekdirektoraat (Opod) is van die voorval in kennis gestel en sal ingevolge standaardprosedure en wetgewende mandaat ondersoek instel,” sê brig. Gantana.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
