VRYSTAAT. – Sewe verdagtes word deur die polisie in Thabong gesoek nadat hulle na ‘n beweerde sakeroof met die polisie in ‘n skietery betrokke was.
Kapt. Stephen Thankeng sê die klaer (64) was omstreeks 01:25 vanoggend saam met ‘n kollega in die winkel. Die gewapende verdagtes het hulle met wapens gedreig om die deur oop te maak. Die slagoffers kon nie daarin slaag om die valkluis in opdrag van die aanvallers oop te maak nie. Die verdagtes het kontant uit die kasregister en twee selfone gebuit.
Die twee werknemers is beveel om op die vloer te lê, waarna ‘n poging om die kluis met springstof oop te kry, onsuksesvol was. Met polisie wat op die toneel aangekom het, het ‘n oor-en-weer-skietery ontstaan. Niemand is egter beseer nie.
Die polisie ondersoek ‘n saak van sakeroof en poging tot moord.
Enigiemand met inligting word versoek om na vore te kom.
